يقولون مالا يفعلون
مابقى الا سود الايام تحرمك الرقاد
كيف الاوهام اتجرا تسريك امغبون
من متى تجزع من الدمع وتخاف البعاد
من متى تقفي بك ظنون وتجيبك ظنون
صرت تأخذ كذبتي صدق ومزاحي وكاد
لو بقول اني بخونك تحسب اني بخون
ماتعرف ان كل شاعر يهيم بكل واد
وانهم دايم يقولون مالا يفعلون
ابك انا لو قلت بنساك وانكرت الوداد
والله اني مانسيتك ولا هم يحزنون
من جزع من صفعه الشمس يطمع بالبراد
ومن فقد وجهاته الخمس يلقى بك ركون
اعتبرها هفوه انسان او كبوه جواد
لوبتسمح فانت غالي ولو تجرح تمون
عد صداتك مروه وطعناتك ضماد
خلهن لاراحن طعون ولاردن طعون
خنجرك يستاهل الطعن ومتوني شداد
ومنك يازين الخناجر ويابخت المتون
رد لي حنيه المزح باحساس الجماد
خلنا واحد يجي صلب والثاني حنون
موت فيني واندفن فيك بثياب الحداد
وان حييت اموت لرضاك واحيا بك بهون
مره ارقد بالكفن وانت ترقد بالمهاد
ومره ارقد بالمهد وانت ترقد بالكفون
ادري ان شجونك شجون وعنادك عناد
البلا ان عنادك عناد وشجونك شجون
ربك اللي سخرك لي تقود وما تقاد
والله الخالق ولله في خلقه شؤون
ازرع ضلوعي من رضاك وابشر بالحصاد
لعنبو من جيت ترضيه وترد امحزون
بس تسوالك بلد قول تسوى لك بلاد
انت كل العالم بكون ولحالك بكون
مابعد محبتك حب ومرادك مراد
غير كونك سيد حشاي تدري من تكون
نعمتين اختص الخلق من جود الجواد
كافل الارزاق من حيث لاتعلمون
البنون ونعمه المال في عيون العباد
زينه الدنيا بلا شك في كل العيون
مثل زينه دنيتي بس عندي شئ زاد
من عرفتك صاروا المال وانتى والبنون
انتشي بك نشوه التيه لعناق الرشاد
وافزع لك بفزعه القرم لشهاق الزبون
واحصنك تحصين الارزاق عن درب الفساد
واعشقك عشق المظاليم لفراق السجون
لو تزيد الشوق جمره تحولني رماد
لو يزيد العشق شعره بوصل للجنون
خل هقواتك كبيره ونظراتك بعاد
كانك انت بكبرك تهون من اللي مايهون
ازعلك وارهن حياتي تحت رحمه زناد
اتهبا لاوالله الاانت والموت تهبون
عاد اذا لاارضاك هرجي ولا اللي قلت فاد
اننا لله وانا اليه راجعون
وانت باكر بتعرف على ناس جداد
والكلام يجيك من كل شكل وكل لون
لاتحسب ان كل كلمه بتسمعها وكاد
ولاتصدق هرج شاعر وتخدعك الظنون
دايم اعرف كل شاعر يهيم بكل واد
وانهم دايم يقولون مالا يفعلون
حتى انا اللي قلت اعشقك وما اطيق البعاد
يمكن اطلع ماعشقتك ولاهم يحزنون
صمت الرحيل
